KIGOGO WA CCM AUWAWA KWA KUKATWA KATWA MASHOKA NA MPANGAJI WAKE!!

KIONGOZI wa Chama cha Mapinduzi (CCM) Shina Namba 30, Kigamboni Kisiwani jijini Dar, Bernadetha Shabani (53) amefariki dunia baada ya kupigwa shoka la kichwa na anayedaiwa kuwa ni mpangaji wake aliyefahamika kwa jina la Shija Ng’waya (33).

Bernadetha Shabani enzi za uhai wake.

Tukio hilo la kikatili lilijiri Mei 5, mwaka huu nyumbani kwa marehemu, Kigamboni jijini Dar es Salaam na marehemu alizikwa Mei 6.Akizungumza na Uwazi kwa uchungu katika msiba wa marehemu huyo mwishoni mwa wiki iliyopita,  mtoto wa marehemu, Ester Shija (hakuna undugu na mtuhumiwa) alisema mlalamikiwa huyo alikuwa mpangaji wao kwa mwaka mmoja akahama.

lisema baada ya muda, mtuhumiwa alirudi kwa marehemu mama yake na kudai kuna vitu vyake aliviacha kwenye chumba.

“Mama alimuuliza ni vitu gani akasema mwiko, tambi za jiko la Mchina, tochi na redio ndogo. Mama alimwambia hakuviona pengine watoto walivichezea. Shija akasema yeye anachotaka ni vitu vyake, akaondoka na kuahidi kurudi siku nyingine.

Ndugu jamaa na marafiki wakijiandaa kwenda kuuzika mwili wa marehemu.

“Kweli, alirudi tena siku nyingine na kumdai mama vitu vyake na akasema vikikosekana atamuua kisha akaondoka.

“Mama alikwenda kutoa taarifa kwa mwenyekiti wa serikali ya mtaa (hakumtaja jina). Shija akaitwa na kuulizwa ni vitu gani? Akavitaja na  kusisitiza kama asingevipata  angemfanyia kitu kibaya mama. Mwenyekiti aliripoti polisi kutokana na vitisho hivyo.

“Awamu nyingine, Shija  alikuja nyumbani akiwa uchi wa mnyama na kudai vitu vyake. Siku hiyo akasema kama hatavipata lazima aue, mwenyekiti akaenda tena polisi, wakaja kumchukua lakini haukupita muda alikuja akamwambia mama, ‘nimetoka na ni lazima nitakuua.’

“Siku nyingine tena Shija akaja. Hii ni mara ya nne, tena alikuwa uchi. Akasema amefuata vitu vyake, mama akampigia simu mwenyekiti na kumtaarifu, akaja na wajumbe wengine wa serikali na kamati ya ulinzi ya kijiji wakamchukua Shija mpaka ofisini kwao, wakamuuliza kama alikuwa tayari kulipwa fedha akavinunue vitu hivyo, akasema yuko tayari kama atapewa shilingi milioni 3.

...Mazishi.

“Mama alimwambia kutokana na maisha yake yalivyo anamuomba amlipe shilingi elfu sabini, Shija akanyanyuka na kuuambia uongozi, ‘mnaona mama huyu alivyo na dharau, hiyo hela haitoshi thamani ya vitu hivyo, nitamuua tu,’’ alisema mtoto huyo akimkariri mtuhumiwa na kulia.

Naye mtoto wa pili wa marehemu, Sofia Mabula alisema: “Shija alifungwa kifungo cha nje cha miezi sita kutokana na makosa yake lakini cha ajabu ndani ya mwezi mmoja akatimiza lengo lake la kumuua mama.

“Sidhani kama mahakama ilistahili kumfunga kifungo cha nje maana alimtishia mama zaidi ya mara nne mwisho wa siku akamuua kweli, inauma sana.”

Mwenyekiti wa serikali ya  mtaa aliyejitambulisha kwa jina moja la Zakaria ‘Waiti’ alisema aliposikia kwa mara ya kwanza kuhusu madai ya vitu hivyo. Alijiuliza vilikuwa na nini cha zaidi!

...Waombolezaji.

“Niliwahi kumuuliza mtuhumiwa kwa nini aling’ang’ania vitu hivyo, akasema alipewa na babu yake ambaye kwa sasa ni marehemu na vifaa hivyo vilikuwa vinamsaidia katika maisha yake kwani vina nguvu ya ziada ndani yake,” alisema mwenyekiti huyo.

Akaongeza: “Alisema tochi kazi yake ilikuwa kuwatibu watoto wadogo wenye mtoto wa jicho, mwiko ulikuwa wa mti wa Mkula ambapo alikuwa akipikia chakula unampa nguvu za kulima. Kuhusu redio ilikuwa ikimsaidia kusikiliza matatizo ya watu.

Askari wa JWTZ aliyejitambulisha kwa jina la Koplo Deus wa Kikosi cha Wanamaji, Kigamboni ndiye  aliyemkamata mtuhumiwa wakati akikimbia kwa kujitumbukiza kwenye Bahari ya Hindi.

Kamanda wa Mkoa wa  Kipolisi Temeke, SACP Alibert Kiondo alithibitisha kutokea  kwa tukio hilo na kusema mtuhumiwa yuko mikononi  mwa polisi, uchunguzi  unaendelea ili kujua utimamu  wa akili yake.